اول شيء الدورة حتكون مرتبة في صورة مستويات حسب مستواك باللغة، وفي كل مستوى حيكون عندك مجموعة وحدات، لكل وحدة ثيم أو موضوع معين نركز عليه بشكل مكثف بحيث تعرف ايش اهم الكلمات اللي تقدر تستخدمها بدا الموضوع.

في البداية حفظ الكلمات: ما حتحفظ اي كلمات مرمية ، انت راح تحفظ بس اهم الكلمات الاساسية في الانجليزي اللي حتواجهك وحتحتاجها اكييد في كل حياتك سواء في القراءة، الكتابة، المحادثة والاستماع وحتحفظها معايا بكروت تثبيت الكلمات. بعد ما تخلص من حفظ الكلمات حيجي وقت المراجعة السريعة، عشان تراجع بشكل سريع كل كلمة حفظتها كان ايش معناها وتتخزن في ذاكرتك طويلة المدى 🧠

في هذي المرحلة حيكون تركيزك على انك تعرف النطق الصح لكل كلمة وكمان تحرك لسانك وتدرب على نطقها اكتر من مرة الين تتقنها، عشان تقدر تتكلم وتمارس اللغة بشكل طبيعي وبنطق صح للكلمات.

وكدا لسه ما خلصنا الكلمات 😅 راح تيجي مرة كمان بعد ٥ ايام تراجع نفس الكلمات اللي حفظتها بطريقة تفاعلية مختلفة عشان تراجع مرة ثانية معنى الكلمة وكيف كانت طريقة نطقها واخيرا بعد ١٠ ايام حيكون عندك مراجعة كلمات لنفس مجموعة الكلمات، يعني الدورة حتكون مهمتها تحفظك الكلمات بدون ما تحتاج تكتب الكلمة ٥٠ مرة عشان تثبت لاطول فترة ممكنة في مخك ⚒️

بعد ما حفظت الكلمات وصار عندك مخزون كبير من الكلمات المهمة في حياتك اليومية تحتاج تبدأ تتدرب اكتر على الجمل اللي ممكن تستخدمها، لذلك هنا راح اعطيك اهم العبارات المناسبة اللي تقدر تستخدمها في موقف معين بنفس الموضوع وحتحفظها معايا بطريقة تفاعلية وحنتدرب عليها مع بعض بحيث تطلع من الدرس وانت خلاص عارف ايش الجمل اللي راح تستخدمها وانت تطلب حاجة مثلا من المطعم.

الانجليزي يتكون من اكتر من ٣٥٠٠ قاعدة جرامر ، ممكن دحين اعطيك كتاب اكتر من ٥٠٠ صفحة يتكلم بس عن القواعد وشرحها لكن السؤال هل انت تحتاج كل هذي القواعد عشان تتكلم صح؟ الاجابة اكيد لا انت تحتاج تتأسس يعني تحتاج تعرف تسوق السيارة منت محتاج تعرف ميكانيكة السيارة والموتور يلف كم لفة بالدقيقة 😅 نفس الموضوع في قواعد اللغة، وبعد ابحاث ودراسات مع فريق من المختبرين قدرت احدد بالزبط ايش اهم القواعد الاساسية اللي ما ينفع تتكلم بدون ما تكون عارفها.

حتلاقي في الدورة شرح للقواعد الاساسية في ٥٠ درس تفاعلي اهكر لك فيه طريقة معرفة القواعد وحتلاقي الشرح ليها باسهل طريقة ممكنة بحيث تعرف بالزبط كيف تستخدم القاعدة بدون ما تجلس ساعة تفكر ايش كانت التركيب الصح لهذي القاعدة.

واعتمدت في هذا القسم على تكنيكة جدا مهمة اللي اسميها (احفظها .. اتعود عليها .. انساها) يعني ما حتحتاج تخزن شرح القاعدة بطريقة مملة في مخك وتسمع التركيب ٥٠ الف مرة عشان تثبت في مخك، انت كل اللي عليك تشوف معايا الشرح وبعدها الدورة حتدربك على استخدامها الين تقول بس وبالتالي تطلع وانت عارف خلاص كيف تستخدمها وتمارسها في حياتك الطبيعية.

من اقوى الاشياء اللي حتكون عندك بالدورة الممارسة التدريجية للقراءة, من أهم المهارات اللي عليك تركز عليها لتعلم اللغة هي ممارسة القراءة، وافضل وسيلة لممارسة القراءة عشان تطور مهاراتك هي قراءة الروايات والقصص بشكل خاص. ودا الكلام بناء على دراسات وابحاث مو بس كلامي..

مثلا في دراسة سووها عام 2013 في مجلة Brain بجامعة إموري في الولايات المتحدة اسمها

Short- and Long-Term Effects of a Novel on in the Brain

واللي بتقول أن القراءة الروائية بتؤثر بشكل كبيير على توصيل الشبكات العصبية تحديدا في القشرة الصدغية اليسرى اللي بتعتبر المنطقة المسؤولة عن اللغة والذاكرة واشياء تانية كتير. ودا لما سجلو تصوير لاشعة الرنين المغناطيسي على الدماغ لما بتقرأ شيء خيالي في اجزاء من المخ بتتحفز وكمان لقو أن تأثير القراءة على الاتصالات العصبية للدماغ بتستمر حتي بعد أسبوعين!

ولانه الدورة تفاعلية فانت ما حتجلس تقرأ لوحدك بطريقة تقليدية انا حكون معاك خطوة بخطوة وحنمارس القراءة مع بعض حناخد الرواية وافصصها معاك حبة حبة بشكل تفاعلي بنظام الجولات الثلاثة اللي هي:

• الجولة الاولى: حتسمع اول حاجة معايا وتركز بس انه تسمع نطق الكلمات وتحاول تفهم الموضوع بشكل عام.

• الجولة الثانية: حقرأ معاك سطر سطر في الصفحة واوضحه ليك ايش كان يقصد بالزبط هنا ولانه الدورة التفاعلية حتلاقيني كل شويتين اسألك ايش صار، طيب ايش معنى دي الكلمة وهكذا عشان اتأكد انك قاعد مركز ومصحصح معايا 😈

الجولة الثالثة: حتسمع مرة كمان بس المرة هذي حيكون الوضع مختلف لانه قرأت معاك وشرحت ليك كل حاجة بالتفصيل فحتسمع وانت فاهم ايش قاعد يصير فحيكون استماع بفهم وبالتالي حتقدر تربط الكلمات بالنطق وبالمعنى

يعني هنا انت حتمارس وتطور ٣ مهارات بنفس الوقت اللي هم الاستماع، القراءة والمحادثة بالاضافة لفهمك واستيعابك لجمل اكتر وكيف تكون تركيبة الجمل الصح من ناحية التراكيب اللغوية والجرامر وحيكون مصدرنا الاساسي في القراءة "روايات اوكسفورد بوكورمز" واللي تعتبر من أقوى مصادر تطوير اللغة من اقوى الجهات التعليمية "اوكسفورد"